SIASA

CHADEMA Wafanya Mkutano Kuwashukuru Wananchi wa Leganga

Leo mchana

BREAKING NYUZZZZ........... CHADEMA YASHINDA KITI CHA UBUNGE ARUMERU MASHARIKI, MATOKEO YATANGAZWA ASUBUHI HII

Mbunge Mteule wa Jimbo la Arumeru Mashariki Mh: Joshua Nassari akiongea baada ya kutangazwa kuwa kumshindi asubuhi hii huko Arumeru

Matokeo ya kura za Ubunge jimbo la Arumeru Mashariki yametangazwa sasa hivi na msimamizi wa uchaguzi na Mkurugenzi wa Wilaya ya Arumeru Bw. Gracias Kagenzi amemtangaza mgombea wa CHADEMA Bw. Joshua Nassarikuwa mshindi baada ya kupata kura 32,972 dhidi ya mpinzani wake wa karibu kutoka CCM Bw Sioi Sumari aliyepata kura 26,757

Matokeo kwa vyama vingine sita vilivyoshiriki ni kama ifuatavyo:-

DP imepata kura 77

NRA imepata kura 35

AFP imepata kura 139

UPDB imepata kura 18

TLP imepata kura 18

SAU imepata kura 22

Kwa mujibu wa Bw. Kagenzi zaidi ya watu 120,000 walijiandikisha na waliojitokeza kupiga

KAMPENI ZA CCM ARUMERULEO LEO ALHAMISI

Mgombea wa CCM jimbo la Arumeru Mashariki, Sioi Sumari akibebwa kwa shangwe wakati wa mapokezi yake alipowasili kijiji cha Kimundo, Kata ya Nkoariasambu kufanya mkutano wa kampeni.

Sioi akisalimia wananchi baada ya kuwasili katika kijiji hicho cha Kimundo, Nkoroasambu.

Kampeni Za CHADEMA Arumeru Jana

Joshua Nassari akinadi sera zake kwenye mkutano wa kampeni ya CHADEMA jana kwenye kijiji cha Ambureni

Wanakijiji wakiikaribisha helkopita ianyotumiwa na CHADMA ilipokuwa ikitua eneo la mkutano Ambureni

Mtoto mdogo akiimba utenzi kumwombea kura Nasari wa CHADEMA

Sehemu ya umati wa wankijiji cha Ambureni Arumeru mashariki wakisikiliza mkutano wa CHADEMA jana
Picha na Jackson Makala

Kampeni Za CCM Arumeru Jana

Dr Slaa Afunika Arumeru ( Gazeti Mwananchi)

AKWEPA KUMJIBU WASSIRA, WAZAZI WA NASSARI WATOA NENO, LEMA AMTAHADHARISHA LOWASSA
Na Waandishi Wetu, Arumeru
KATIBU Mkuu wa Chadema, Dk Willibrod Slaa jana alitua Arumeru Mashariki na kuhutubia mkutano uliotikisa eneo la Kwapole – Soko la Ndizi, huku wazazi wa mgombea wa chama hicho, Joshua Nassari wakipanda jukwaani kujibu matamshi yaliyotolewa na Waziri wa Nchi, Ofisi ya Rais (Uhusiano na Uratibu), Steven Wassira dhidi ya mtoto wao.
Mchungaji Samuel Nassari na mkewe, waliwaambia mamia ya watu waliofika kwenye uwanja huo

Dkt.Slaa Akihutubia Arumeru Jana

Chadema Mkuranga Yazidi Kusomba Wasomi

Chama Cha Demokrasia na Maendeleo CHADEMA Wilaya ya Mkuranga kimezidi
kujiongezea umaarufu wake kwa kuzidi kusomba wasomi wengi wilayani
humo. Mwenyekiti wa CHADEMA wilaya ya Mkuranga Bw Jamal Lwei
amekaririwa akisema...kwetu haya ni mafanikio makubwa kwani chama sasa
kinakua kwa kasi na wasomi wanaonekana kukubali mipango, sera na
harakati zetu....

Mwenyekiti huyo aliyasema hayo mapema leo asubuhi huku pia akitoa
salamu za pole kwa baadhi ya wanamkuranga waliofikwa na maafa kutokana
na mvua zilizoambatana na upepo siku ya jana , ambapo taarifa za awali
zinabainishwa kuezuliwa kwa mapaa ya baadhi ya nyumba za wananchi wa
wilaya hiyo na nyingine kuangukiw na miti.

Mwenyekiti huyo pamoja na mambo mengine pia amezungumzia uchaguzi wa
Arumeru Mashariki huku akisisitiza kuwa ana imani wana Arumeru
watamchagua Nassari kutokana na uwezo wake mkubwa wa kusimamia sera za
kimaendeleo.

Duru za kisiasa kutoka jimbo la Mkuranga ambalo linashikiliwa na Adam
Malima zinabainisha kuwa sababu ya wasomi wengi kuhamia CHADEMA ni
pamoja na kushindwa kwa sera za CCM za maisha bora kwa kila mtanzania
huku wananchi wakiendelea kusota kwenye umasikini mkubwa huku viongozi
wa serikali hasa wale wateule wa rais Kikwete wakiogelea kwenye
utajiri mkubwa. 

Baadhi ya wananchi wameenda mbali zaidi huku wakihoji
kuhusu mgao wa umeme, matokeo mabovu ya shule za sekondari na msingi
pamoja na huku wakiishinikiza serikali iwalipe malipo ya fedha za
korosho ambazo wamesema bado hawajalipwa.

Moto Wazidi Kumwakia Mkapa

• NEC yatupa rufaa ya Nassari na kumsafisha Sioi

na Mwandishi wetu, Arumeru

SIKU moja baada ya kuwepo taarifa kuwa Rais mstaafu Benjamin Mkapa, anahaha kutafuta suluhu baina yake na mbunge wa Musoma Mjini, Vicent Nyerere, kwa familia ya Mwalimu Julius Nyerere, Chama cha Demokrasia na Maendeleo (CHADEMA), kimesema kiongozi huyo anapaswa kurudi Arumeru Mashariki na kuomba radhi mbele ya wananchi kwa uongo aliousema.

Mkapa alikaririwa na vyombo vya habari hivi karibuni wakati akizindua kampeni za mgombea wa ubunge jimbo la Arumeru Mashariki kwa tiketi ya Chama cha Mapinduzi (CCM), Sioi Sumari, akisema kuwa mbunge Vicent Nyerere si mmoja wa wanafamilia ya Mwalimu Nyerere.

Kutokana na tuhuma hizo, CHADEMA kimewataka wakazi wa Arumeru na Watanzania kwa ujumla kuwa makini na CCM, kwani kimekuwa kikitumia mbinu zisizo halali kuendelea kutawala ikiwemo kuwarubuni, kulaghai na kusema uongo.

Akizungumza na waandishi wa habari na baadhi ya wananchi wa Arumeru jana, meneja kampeni wa CHADEMA, Mchungaji Israel Natse, alisema kuwa kama kweli Mkapa anataka kujisafisha kwa uongo aliosema mbele ya wananchi, dawa pekee inayoweza kumsaidia ni kurudi na kuwaomba radhi.

“Unajua tunapowaambia wananchi kuwa wawe makini na CCM na viongozi wake mifano sahihi ndiyo hii…kama mwenyekiti mstaafu anaweza kusema uongo kama huo mbele za watu sasa itakuwaje kwa watendaji wa chini yake, itakuwaje kwa wanachama wa kawaida, chama hiki kimefika mwisho, hakiwezi tena kusimama mbele ya wananchi na hapa Arumeru itakuwa ni moja ya fundisho kuwa zama zao,” alisema.

Naye Vicent Nyerere amemtaka Mkapa akamwonyeshe ukoo alikozaliwa baada ya kuutangazia umma kuwa hatoki katika familia ya Mwalimu Nyerere.

“Unajua mimi nashangaa kwa mtu mzima kusema uongo mbele ya wananchi, tena kiongozi anayepaswa kuaminiwa na watu anaowaongoza. Alipofariki baba yangu ambaye alikuwa rafiki yake na Mkapa pia, alikuja nyumbani kwetu kwenye msiba…hata rambirambi alinikabidhi mimi.

“Sasa kwa kuwa kasema mimi si familia ya Nyerere, anipeleke huko kwenye hiyo familia nyingine,” alisema Nyerere.

Wakati viongozi hao wakisema hayo, chama hicho kiliamua kuahirisha mikutano yake ya kampeni kwa siku ya jana iliyopaswa kufanyika katika maeneo ya King’ori, Maroroni na Makiba, kutokana na mgombea wake, Nassari kufiwa na baba yake mdogo Elisa Nassari.

Mapema kabla ya kwenda kwenye mazishi hayo, mgombea huyo na timu zima ya kampeni walikwenda Hospitali ya Nkoaranga ambako walitembelea wagonjwa katika wodi mbalimbali kuwatakia uponaji wa haraka na afya njema. Katika ziara hiyo pia waliweza kufika katika kituo cha watoto yatima cha Nkoaranga kinachohudumiwa na hospitali hiyo na kujumuika nao kwa muda.

Chadema Waiteka Arumeru 

BARABARA ZAFUNGWA, HELKOPTA YAPASUA ANGA,MBOWE ALIA WINGI WA POLISI, NASSARI AAHAIDI KUTATUA KERO ZA WANANCHI.
Waandishi Wetu, Arumeru
 CHAMA cha Demokrasia na Maendeleo (Chadema) jana kiliuteka mji wa Usa River, wilayani Meru pale kilipozindua kwa kishindo kampeni za uchaguzi mdogo wa ubunge Jimbo la Arumeru Mashariki, mkoani Arusha.Shamrashamra za uzinduzi huo zilianza asubuhi na ilipotimu saa 7.40, helikopta yenye stika ya maneno CHADEMA, ilianza kuzunguka angani katika jimbo hilo, huku ikisambaza vipeperushi vinavyomnadi mgombea wa chama hicho, Joshua Nassari.

Mamia ya wapenzi na wanachama wa chama hicho walifurika katika Uwanja wa Shule ya Msingi, Leganga, Usa River kuazia saa saba mchana ambako uzinduzi wa kampeni ulifanyika zikiongozwa na Mwenyekiti wa Chadema, Freeman Mbowe.

Mbowe na Nassari walifika kwenye Uwanja wa Leganga wakiwa kwenye helikopta saa 8.45 na kulakiwa na viongozi walioongozwa na Naibu Katibu Mkuu wa Chadema, Zitto Kabwe pamoja na wabunge kadhaa wa chama  hicho.

Polisi pamoja na walinzi wa kikundi cha usalama cha Chadema, Red Brigade walipata wakati mgumu kuwadhibiti wafuasi waliokuwa wakitaka kusalimiana na viongozi hao walipowasili uwanjani hapo.

Hali hiyo pia iliwaathiri wapigapicha wa vyombo vya habari ambao walikwaruzana na polisi na walinzi wa Chadema walipokuwa katika harakati za kutekeleza majukumu yao.

Katibu Mkuu wa Chadema, Dk Willibrod Slaa hakuhudhuria uzinduzi huo kutokana na kile kilichoelezwa na viongozi wa chama hicho kwamba yuko nchini Italia kwa safari ya kikazi.

Mbowe ambana Tendwa
Katika mkutano huo, Mbowe alimtaka Msajili wa Vyama vya Siasa nchini, John Tendwa kutoa tamko juu ya CCM kukiuka Sheria ya Uchaguzi kwa kutumia kiasi cha Sh220 milioni wakati wa mikutano miwili ya kupitisha mgombea wao wa ubunge wa Jimbo la Arumeru Mashariki.

Mbowe alisema Sheria ya Uchaguzi mdogo imeweka kiwango cha juu cha matumizi ya fedha ambazo zinapaswa kutumika zisizidi Sh80 milioni.

“Tunamuomba Tendwa atoe tamko juu ya hili, kwani mkutano wa kwanza wa CCM walikuwa na wajumbe 1,034 ambao kila mmoja alilipwa posho ya Sh50,000 na walitumia zaidi ya Sh100 milioni na mkutano wa pili ulikuwa na wajumbe1,044 ambao walitumia zaidi ya Sh120 milioni,” alisema Mbowe.

Alisema chama hicho, kilikuwa na wajumbe 888 na kilitumia kiasi cha Sh6.2 milioni pekee kutokana na usafiri na chakula kwa wajumbe.

Akizungumzia uchaguzi mdogo wa Jimbo la Arumeru Mashariki, Mbowe aliwataka wakazi wa jimbo hilo kutambua kuwa uchaguzi huo sio wa Meru pekee bali una sura ya kitaifa.

“Taifa zima linafuatilia Arumeru Mashariki kujua mnafanya nini, nawaomba sana mtuchagulie Joshua Nassari ili mtuongezee nguvu bungeni dhidi ya chama cha magamba kwani mbunge mmoja wa Chadema ni sawa na wabunge 30 wa CCM,” alisema Mbowe.

Kuhusu Tume ya Taifa ya Uchaguzi, Mbowe alilalamika kwa kitendo cha kukataa vijana wenye umri unaofikia miaka 18 hadi 19 kutopiga kura sambamba na watu waliohamia Meru katika kipindi cha miezi 13 tangu kufanyika uchaguzi mkuu.

“Haki ya kupiga kura sio ya Tume ya Uchaguzi au Serikali ni haki ya kikatiba ya wananchi hivyo nimempigia simu Mwenyekiti wa Tume ya Uchaguzi, Jaji mstaafu, Damian Lubuva lakini amesisitiza ambao watapiga kura ni wale waliojiandikisha mwaka 2009,”alisema Mbowe.

Mbowe pia alieleza kusikitishwa na uamuzi wa Mkuu wa Jeshi la Polisi nchini(IGP) Saidi Mwema kuleta Meru magari zaidi ya 40 ya polisi, magari manne ya kumwaga maji ya kuwasha na shehena kubwa ya mabomu ya machozi.

“Mambo yote haya ya nini, tunaomba polisi mtuachie CCM tucheze nao na msitulaumu pale ambao mtasababisha vurugu,” alisema Mbowe.

Kauli ya Nassari
Kwa upande wake Nassari aliomba wakazi wa Meru wamtume kuwa mbunge ili awatetee ardhi yao, inayomilikiwa na wachache, asaidie kushughulikia tatizo la maji, ajira kwa vijana na masoko ya uhakika ya bidhaa mbalimbali, ikiwepo soko la kila wiki la Mbuguni

Nasari pia ambaye alimtambulisha mama yake mzazi na baba yake, jukwaani na kueleza walimsomesha hadi chuo kikuu kwa fedha za mbogamboga huku mama yake akipigwa na askari mgambo wa halmashauri.

Alisema hoja ya CCM kuwa asichaguliwe kwa kuwa hajaoa haina msingi.“Mbona wabunge wengine, Zitto Kabwe, John Mnyika na David Silinde ambaye tulikuwa naye chuo kikuu hawajaoa na wala hawana mpango wa kuoa mapema kama mimi, wamechaguliwa na wanafanya vizuri,” alisema Nassari.

Nassari(26) alieleza katika uchaguzi wa mwaka huu atahakikisha wanashirikiana na kulinda kura kwani kuna hofu ya kura zake kuibiwa kama ilivyotokea katika uchaguzi uliopita ambapo alichuana na marehemu Jeremiah Sumari.

Shamrashamra
Mbali na hamasa ya helikopta, uzinduzi huo pia ulishuhudia maandamano kutoka pande mbili za barabara kuu ya Moshi – Arusha, ambako kulikuwa na maandamano ya magari na mamia ya pikipiki zilizokuwa zimepambwa na bendera za Chadema na mabango ya picha za Nassari.Maandamano hayo yalisababisha kufungwa kwa muda kwa barabara hiyo na kukwaza usafiri kwa watumiaji wa barabara hiyo.

Hali hiyo pia ilijitokeza wakati wa jioni baada ya kampeni kumalizika kwani misafara mirefu yenye magari na pikipiki ilisababisha msongamano katika barabara hiyo.

Kutoka upande wa Moshi maandamano ya pikipiki yaliongozwa na Mbunge wa Iringa Mjini, Mchungaji Peter Msigwa, wakati kutoka mjini Arusha maandamano yaliongozwa na Mbunge wa Arusha mjini, Godbless Lema.
Muda mfupi kabla ya kuanza kwa mkutano huo, aliingia farasi ambaye alikuwa amebeba mabango ya picha za Nassari na bendera za Chadema.

Viongozi wengine
Zitto aliwaomba wananchi wa Arumeru kuenzi msingi ulioasisiwa na wazee wao kwa kusimama kutetea haki dhidi ya uonevu akitaja tukio la mwaka 1951 walipochanga fedha na kumtuma Mzee Japhet Kirilo kwenda Makao Makuu ya Umoja wa Mataifa (UN), kudai ardhi ya Meru iliyokuwa ikikaliwa na walowezi wa kikoloni.

“Meru mlimtuma Mzee Kirilo UN kudai ardhi yenu, sasa ni wakati wa kumtuma kijana wenu Nassari (Joshua) kuwatetea bungeni. Ubora wa Nassari hauko kwenye ujana wala elimu yake, bali chama chake cha Chadema anachotoka ambacho kimejipambanua kuwa mtetezi wa haki Tanzania,” alisema Zitto

Zitto aliwataka wana Arumeru.... Soma zaidi: http://www.mwananchi.co.tz

Mkutano Wa Uzinduzi CHADEMA

Wanakijiji,kumradhi tumechelewa kuweka picha hizi kutokana na tatizo la umeme hapa Arumeru.kutwa nzima kulikuwa mgawo, umerudi usiku na mitandao inaleta shida.Tutaendelea kujitahidi ili mpate picha mapema zaidi.

Mdau wa Mjengwablog,Arumeru

Nape Akutana Na Ujumbe Wa Uingerza

 .Katibu wa Halmashauri Kuu ya Taifa, Itikadi na Uenezi Nape Nnauye akimkaribisha Naibu Mkurugenzi wa Kitengo cha Masuala ya Afrika wa Uingereza Nick Pyle aliyemtembelea katika Ofisi Ndogo ya Makao Makuu ya CCM, Lumumba mjini Dar es Salaam. Kushoto ni Balozi Msaidizi wa Uingereza hapa nchini, Susie Kitchens

  Katibu wa Halmashauri Kuu ya Taifa, Itikadi na Uenezi Nape Nnauye akizungumza na Naibu Mkurugenzi wa Kitengo cha Masuala ya Afrika wa Uingereza Nick Pyle (kushoto) aliyemtembelea katika Ofisi Ndogo ya Makao Makuu ya CCM, Lumumba mjini Dar es Salaam. Katikati ni Balozi Msaidizi wa Uingereza hapa nchini, Susie Kitchens

 Katibu wa Halmashauri Kuu ya Taifa, Itikadi na Uenezi Nape Nnauye akiwa katika picha ya pamoja na Naibu Mkurugenzi wa Kitengo cha Masuala ya Afrika wa Uingereza Nick Pyle (Wapili kushoto) baada ya mazungumzo yao leo, Ofisi Ndogo ya Makao Makuu ya CCM, Lumumba mjini Dar es Salaam. Kushoto ni Balozi Msaidizi wa Uingereza hapa nchini, Susie Kitchens.

CCM, Chadema Sasa Vita Rasmi

SLAA, MKAPA KUONGOZA MAPAMBANO ARUMERU, NASSARI, SUMARI WAPITISHWA

Na Waandishi wetu, Dar na Arusha

VYAMA vya CCM na Chadema vimetangaza rasmi vita ya kuwania Ubunge Jimbo la Arumeru Mashariki, mkoani Arusha huku vikianika majina ya makada watakaoongoza mapambano kwa ajili ya kujihakikishia ushindi.

CCM ambayo imempitisha Siyoi Sumari kuwania nafasi hiyo, imesema kampeni zake zitazinduliwa na Mwenyekiti mstaafu wa chama hicho ambaye pia alikuwa Rais wa awamu tatu, Benjamin Mkapa na Chadema itawatumia viongozi wake wa kitaifa, wakiongozwa na Mwenyekiti wake Freeman Mbowe na Katibu Mkuu, Dk Willibrod Slaa.

Wakati huohuo, Kamati Kuu (CC) ya Chadema jana ilimpitisha, Joshua Nasari kupeperusha bendera ya chama hicho katika uchaguzi mdogo wa jimbo hilo.

Mwenyekiti wa Taifa wa Chadema, Mbowe aliwaeleza viongozi wakuu wa chama hicho, wapenzi na wafuasi wa Chadema waliojazana eneo la Hoteli The Ice Age Usa-River, wilayani Arumeru jana kuwa wamejiandaa kikamilifu kunyakua jimbo hilo na kamwe hawatakubali hujuma zozote kutoka kwa mtu au chama chochote.

Mbowe aliyezungumza kabla ya kumkaribisha Katibu Mkuu wake, Dk Slaa kumtanga rasmi Nasari, alitamba kuwa mchakato wa kumtafuta mgombea kupitia chama hicho haujaacha nyufa wala mifarakano miongoni mwa wagombea na wafuasi wao kama ilivyotokea kwa vyama vingine vya siasa ambavyo hakuvitaja.

Alisema mara nyingi mipasuko ndani ya vyama vya siasa hutokana na mchakato wa kupata wagombea kutokana na hila za baadhi ya viongozi, wanachama au wapambe wa wagombea, hali aliyosema haijajitokeza ndani ya Chadema kutokana na mfumo mzuri unaozingatia demokrasia kwa wote bila kujali umaarufu au ukwasi wa mtu.

“Wagombea wote waliojitokeza kuchukua fomu kuomba uteuzi tumewaalika katika Kamati Kuu na wote wameridhika na ushindi na uteuzi wa mgombea mwenzao na wote watashiriki kikamilifu kwenye kampeni kuhakikisha ushindi wa chama unapatikana,” alisema Mbowe.

Akitangaza uamuzi wa Kamati Kuu, Dk Slaa, alisema kikao hicho kilichoshirikisha wabunge, mameya na wenyeviti wa halmashauri za wilaya zinazoongozwa na Chadema, kwa kauli moja kilipitisha jina la Nasari kuitikia sauti ya wananchi na wakazi wa Arumeru waliomchagua kwa kura 805 kati ya 888 zilizopigwa kwenye kura za maoni.

“Wananchi Arumeru tumesikia kauli yenu kupitia kura zenu za maoni, Nasari ni kijana wenu siyo wa Dk Slaa, Mbowe wala Chadema.

Katika kura za maoni, Nasari alimwacha mbali mgombea wenzake Anna Mghiwa aliyemfuatia kwa kupata kura 23 huku wagombea wengine wanne, wakipata kura chini ya 20.

Chama hicho pia kinaendelea kufanya tathimini ya kutumia helikopta katika kampeni zake katika jimbo hilo.

Nasari ashukuru

Akitoa shukrani mbele ya wajumbe wa Kamati Kuu ya chama chake, Nasari aliwaomba wafuasi, wapenzi na wanachama wote wa Chadema kushikamana na kuwa tayari kwa mapambano ya haki, kuhakikisha wanaibuka na ushindi mnono kwenye uchaguzi huo unaotarajiwa kuwa na ushindani mkubwa.

"Wao (CCM), najua watatumia dola na fedha, lakini sisi tusihofu kwani tuna Mungu anayetupigania kwa sababu mapambano yetu ni kudai haki dhidi ya uovu.

Kwa pamoja tukishirikiana kuondoa hofu kwani tutashinda," alisema Nasari.

CCM

Kwa upande CCM Kamati Kuu (CC) ya chama hicho jana ilimteua Mwenyekiti mstaafu ambaye pia ni Rais mstaafu wa awamu ya Tatu , Mkapa, kuongoza kampeni za kumnadi Mgombea Ubunge wa chama hicho, Siyoi Sumari katika jimbo la Arumeru Mashariki.

Akizungumza na waandishi wa habari jana jijini Dar es Salaam, Katibu wa Itikadi na Uenezi wa Halmashauri Kuu ya CCM, Nape Nnauye, alisema kikao cha kamati hiyo kilichoketi jana, kilipitisha jina la Siyoi kuwania nafasi hiyo iliyoachwa na baba yake, Jeremia Sumari aliyefariki usiku wa Januari 18 mwaka huu.

Nape alieleza kwamba, kamati hiyo pia imemteua Katibu wa Idara ya Uchumi na Fedha ya chama hicho, Mwingilu Nchemba kuratibu kampeni hizo.

Katika uchaguzi mdogo wa jimbo la Igunga ambao CCM ilishinda, Mkapa ndiye aliyefungua kampeni hizo huku, Nchemba akiratibu kuanzia mwanzo hadi mwisho.

Akizungumzia tuhuma za rushwa ambazo zimekuwa zikiripotiwa katika mchakato wa uteuzi, aliitaka Takukuru kuhakikisha wanakamata mtandao mzima uliohusika na utoaji rushwa.

Kauli ya Siyoi

Sumari, aliambia Mwananchi Jumapili kuwa kwamba pamoja na kufurahishwa na uamuzi wa Kamati Kuu ya CCM kupitisha jina lake kupeperusha bendera ya CCM wilayani Arumeru Mashariki, chama hicho kinapaswa kutoa ushirikiano wa dhati kuhakikisha kinatetea jimbo hilo.

Hata hivyo, alisisitiza kwamba changamoto zote alizozipitia katika mchakato wa uteuzi , zikiwemo tuhuma mbalimbali za rushwa ni misukosuko ya kisiasa ambayo haiwezi kuepukwa zaidi ya kukabiliana nayo.

“Nashukuru chama kwa kupitisha jina langu, lakini changaomoto zote nilizokuwa nikipitia naamini ni misukosuko tu ya kisiasa, lakini tusahau yaliyopita sasa tusonge mbele kunyakua ushindi,” alisema Sumari

UVCCM

Katika hatua nyingine Jumuiya ya Umoja wa Vijana wa CCM (UVCCM ) wilayani Arumeru, imefurahishwa na uamuzi uliofanywa na CC ya CCM kumpitisha Siyoi kupeperusha bendera ya chama hicho na kueleza kwamba kilio cha wanachama wa CCM wilayani humo, sasa kimesikilizwa.

Hata hivyo, wakati jumuiya hiyo ikiupokea ushindi huo kwa furaha, Taasisi ya Kuzuia na Kupambana na Rushwa(Takukuru) imeendelea na kamata kamata yake ambapo safari hii ilimshikilia na kumhoji kwa muda Katibu Hamasa wa umoja huo wilayani Arumeru Mashariki, John Nyiti kisha kumwachia huru.

Mwenyekiti wa Jumuiya hiyo, Esther Maleko alisema mbali na kilio cha wakazi wa jimbo hilo kusikika juu ya mgombea wao, umoja wao umejipanga kikamilifu kuingia ulingoni kuhakikisha ushindi unapatikana.

Hekaheka za uchaguzi wa jimbo hilo wakati zikiendelea baadhi ya makada wa CCM na UVCCM wilayani humo wameendelea kukumbwa na misukosuko baada ya viongozi wake akiwemo Nyiti kushikiliwa na Takukuru kwa tuhuma za kujihusisha na vitendo vya rushwa wilayani humo.

Nyiti alipoulizwa juu ya taarifa hizo kwa njia ya simu alikiri kukamatwa na maofisa wa Taasisi hiyo.

Kamanda wa Takukuru mkoani Arusha, Mbengwa Kasumambuto alipoulizwa na gazeti hili juu ya taarifa hizo hakuweza kukiri wala kukataa juu ya kuhojiwa kwa kada huyo na kudai kwamba wanaohojiwa na Taasisi hiyo wako wengi na wengine wanahojiwa kama mashahidi, hivyo alidai si vyema kuwataja majina kwa kuwa bado wanakamilisha uchunguzi wao.

Hali ilivyo ndani ya vyama

Makundi ya vigogo wa CCCM ambao wanajipanga kugombea Urais mwaka 2015, yametajwa kusababisha mpasuko mkubwa ndani ya chama hicho katika uteuzi wa mgombea wa Ubunge Arumeru Mashariki.

Mpasuko wa makundi hayo, inaelezwa unaweza kuchangia chama hicho kupoteza jimbo hilo.

Sumari amekuwa akiungwa mkono na kundi la Mbunge wa Jimbo la Monduli, Edward Lowassa huku wagombea wengine, walikuwa wakiungwa mkono na kundi la na vigogo wa chama hicho wanaojipambanua kuwa ni wapiganaji dhidi ya ufisadi...Soma zaidi www.mwananchi.co.tz                            

Mgombea ubunge jimbo la Arumeru Mashariki kupitia Chama Cha Mapinduzi,Sioi Sumari(kulia) akisalimiana na wajumbe wa mkutano mkuu wa jimbo hilo eneo la Usa River,wilayani Arumeru kabla ya upigaji kura za maoni za chama hicho juzi.

CCM kusuka au kunyoa

KAMATI KUU YAKUTANA LEO ARUSHA, SIYOI AFUGASHIWA TUHUMA ZA RUSHWA, TAKUKURU WATINGA RADIO YA LOWASSA Waandishi Wetu MVUTANO mkali umeripotiwa kutokea ndani ya kikao cha Kamati ya Siasa ya CCM, Mkoa wa Arusha kuhusu ni mapendekezo yapi yapelekwe mbele ya Kamati Kuu (CC) ya chama hicho baada ya matokeo ya kura za maoni kwa wanaowania kupitishwa na chama hicho kuwania ubunge katika uchaguzi mdogo Jimbo la Arumeru Mashariki. Habari kutoka ndani ya kikao hicho zinasema mvutano huo ulisababishwa na baadhi ya wajumbe wa kutaka kuondolewa kwa jina la mshindi katika kura hizo, Sioyi Sumari kwa madai kwamba ushindi wake wa kura 761 uliambatana na vitendo vya rushwa hivyo hafai kuwa mgombea wa CCM. Katika matokeo ya uchaguzi uliorudiwa juzi, Siyoi aliibuka mshindi kwa kupata kura 761 ambazo ni sawa na asilimia 67.8 ya kura halali 1,122 zilizopigwa, dhidi ya asilimia 32.2 za mpinzani wake, William Sarakikya ambaye anadaiwa kwamba anapigiwa chapuo na viongozi wa CCM na Serikali katika ngazi za wilaya, mkoa na taifa. Katika uchaguzi wa awali wa kura za maoni uliofanyika Februari 20 mwaka huu, Siyoi ambaye ni mtoto wa aliyekuwa Mbunge wa jimbo hilo, Jeremia Sumari aliyefariki hivi karibuni, aliongoza kwa kupata kura 361 akifuatiwa na Sarakikya aliyejinyakulia kura 259. Habari zinasema wakati kikao kikiendelea jana, mmoja wa vigogo wa Serikali ambaye ni mjumbe wa kikao hicho anadaiwa kuomba kwenda kufuata ripoti ya tuhuma za rushwa katika Ofisi za Taasisi ya Kuzuia na Kupamba na Rushwa (Takukuru), mkoani Arusha. Baada ya muda inadaiwa kwamba alirejea na kile kilichodaiwa kuwa ni ripoti hiyo kisha kuiwasilisha mbele ya kikao akiwaonyesha wajumbe vielelezo mbalimbali vilivyopo ndani yake. Taarifa hiyo ndiyo inayodaiwa kusababisha vuta nikuvute kutokana na baadhi kuipinga huku wengine wakiiunga mkono. Katibu wa CCM Mkoa wa Arusha, Mary Chatanda alipoulizwa juu ya taarifa hizo alikanusha akisisitiza kwamba kikao hicho kilikuwa ni cha siri na taarifa zake haziwezi kuzungumzwa hadharani. Imeelezwa kwamba kutokana na mvutano huo ndani ya Kamati ya Siasa ya Mkoa wa Arusha, wajumbe waliamua kwamba majina yote mawili, ya Sioi na Sarakikya yapelekwe mbele ya CC kama matokeo ya kura za maoni yanavyoonyesha yakiambatanishwa na maelezo na kile kilichodaiwa kuwa ni vithibitisho vya rushwa. Kamati Kuu leo Kutokana na hali hiyo ni dhahiri kwamba kikao cha Kamati Kuu  kinachokutana Arusha leo chini ya Rais Jakaya Kikwete kufanya uteuzi wa mwisho wa mgombea atakayebeba bendera katika uchaguzi huo, kitakuwa na wakati mgumu kufikia uamuzi kwa kuzingatia mambo makubwa mawili. Kwanza kuamua kumweka pambeni Sumari kutokana na tuhuma hizo za rushwa zinazomwandama baada ya wanaodaiwa kuwa wafuasi wake kukamatwa na Takukuru lakini pili kumpitisha mgombea huyo kwa kuzingatia ushindi wa kura nyingi alizopata kwa wana CCM wenzake wa Arumeru. Akichambua mwenendo wa kumpata mgombea wa CCM katika jimbo hilo, Mhadhiri wa Sayansi ya Siasa katika Chuo Kikuu cha Dar es Salaam, Profesa Gaudence Mpangala alisema uamuzi wa wapiga kura unapaswa uheshimiwe. “Tatizo letu Watanzania hatufuati misingi kamili ya demokrasia. Tunafuata tu matakwa ya watu binafsi. Kama kwenye kura za maoni za kwanza, Siyoi alishinda na kwa mara ya pili ameshinda, kuna haja gani tena ya kujadili jinsi ya kumpata mgombea?” alisema Profesa Mpangala na kuongeza: “Kule tu kurudia kura za maoni ni ukiukwaji wa demokrasia. Hakukuwa na sababu za msingi za kurudia kwani mshindi alishapatikana. Hizi ni siasa za kizamani za chama kimoja. Kama wanafuata matakwa ya wakubwa kwa nini kuwe na uchaguzi? Kwa nini kampeni zipigwe kwa miezi miwili na zaidi? CCM inapaswa kubadilika na kusikiliza uamuzi wa wananchi.” Huku akimnukuu Katibu wa Itikadi na Uenezi wa chama hicho, Nape Nnauye, Profesa Mpangala alisema utaratibu wa kurudia kura za maoni haupo hata kwenye Katiba ya CCM isipokuwa hutokea tu kwa matakwa ya watu fulani. “Nape alisema japo utaratibu huo haupo, lakini hutokea tu kwa nyakati fulani. Alitoa mfano wa kinyang’anyiro cha urais ndani ya CCM mwaka 1995 ambapo Rais Kikwete alishinda, lakini ikaamuliwa kuwa kura zirudiwe na ndipo aliposhinda Mkapa. Kimsingi kura za maoni huwa hazirudiwi. Mimi sijui kwa nini zimerudiwa huko Arumeru. Kama Sioyi alishinda na sasa ameshinda, basi hiyo ni dalili ya kukubalika kwa wananchi. Ikiwa kikao cha Kamati Kuu kitamwengua, basi tutajua kuwa CCM hakifuati misingi ya demokrasia.” Wafanyakazi wa Lowassa Wakati hayo yakijiri, kamatakamata ya Takukuru iliendelea  na safari hii ilianza kuwakumba pia wanahabari. Miongoni mwa wanahabari waliothibitika kutiwa mbaroni jana ni Meneja wa Kituo cha Redio 5, Jimmy Mtemi. Kituo hicho kinamilikiwa na Waziri Mkuu aliyejiuzulu, Edward Lowassa Wana CCM wengine watatu walikamatwa kwenye msako huo wa Takukuru. Chanzo cha habari kutoka kwenye Redio hiyo kilieleza kwamba maofisa hao walitumia siku nzima ya jana kumtafuta Ofisa mmoja wa Redio hiyo, Pili Sirikwa. “Hawa jamaa baada ya kumkosa Pili walikuja huku Njiro kilipo kituo cha redio wakamwulizia, walipoambiwa hayupo wakaondoka. Baada ya muda kupita walirudi tena sasa hapo ilionekana kuwa ni kwa ugomvi kwani mlinzi aliyekuwa getini walimsukuma na kuvamia ndani kisha kwenda moja kwa moja ofisini kwa Meneja. “Baada ya kufika hapo walimweleza kuwa wanahitaji kuondoka naye hadi ofisini kwao kwa ajili ya mahojiano. Lakini kabla ya kuondokana naye walimpora simu zake za mkononi na kuzizima,” alidai mtoa taarifa wetu. Kamanda wa Takukuru Mkoa wa Arusha, Mbengwa Kasomambuto alipoulizwa kama ana taarifa zozote za kukamatwa kwa Meneja wa Redio 5, alisema bado hajapata taarifa hizo kwani alikuwa nje ya ofisi. “Nipo nje ya ofisi nadhani kesho nitakuwa na taarifa sahihi,” alisema Kasomambuto. Chadema nao leo Kwa upande wake, Kamati Kuu ya Chadema leo pia inatarajia kufanya kikao hapa Arusha kutangaza jina la mgombea wao, Joshua Nassari kuwania kitu hicho.Katibu Mkuu wa Chadema, Dk Willbrod Slaa alisema juzi kuwa kikao hicho kitafanyika wilayani Arumeru na tayari wajumbe kadhaa wamewasili Arusha. “Wanachama wa Arumeru na viongozi wao wamekwishaamua juu ya mgombea wao na wametuletea mapendekezo yao na sisi tutatangaza mgombea,” alisema Dk Slaa. Matokeo ya kura za maoni ndani ya chama hicho zilizopigwa Jumatano iliyopita yanaonyesha kwamba Nasari aliibuka na ushindi wa kishindo wa kura 805, sawa na asilima 90.6 ya kura zote 888 zilizopigwa akifuatiwa kwamba mbali na Anna Mghiwa aliyepata kura 23. Wagombea wengine na kura zao kwenye mabano ni pamoja na Samuel Kimutho (10), Yahane Shami (6), Antthon Musami (8), Rebecca Magwisha (12) na Goodlove Temba aliyepata kura 18.

CUF Haitakufa-Mtatiro

Kufuatia taarifa jana usiku saa mbili ITV kuwa uongozi mzima wa CUF wilayani Musoma umejiengua kwenye chama hicho,nilimpigia simu naibu katibu mkuu bara ambaye yuko ziarani,kutaka mwitiko wake na maoni dhidi ya hisia kwamba CUF kilikuwa kinakufa.Mara moja na kwa uhakika amesema CUF HAITAKUFA BALI IPO KWENYE HATUA KUELEKEA KUIMARIKA ZAIDI.Anasema ni lazima matukio haya yatokee ili kufikia kilele cha mafanikio.anasema ili mbegu iote hufa kwanza na kwamba hiki ni kipindi cha utakaso.Amewataka wana CUF kUWA WAVUMILIVU WAKATI HUU AMBAPO CHAMA KINAJIJENGA KUTOKEA NDANI.

BAVICHA Kufundisha Vijana Itikadi Ujerumani

Baraza la Vijana wa CHADEMA (BAVICHA) limekuwa na kawaida ya kutoa fursa za mafunzo ya makada wake ndani na nje ya Tanzania.

Dira ya BAVICHA ni kuona vijana ni nguvu ya mabadiliko ya kidemokrasia kwa maendeleo yao na ya taifa.

Kwa awamu hii BAVICHA limepanga kupeleka kada wake kwenye mafunzo ya wiki moja kwa wanasiasa vijana (Summer School) Berlin, nchini Ujerumani.

BAVICHA inawaalika vijana wa CHADEMA watakaopenda kushiriki mafunzo hayo kutuma barua ya maombi ya kushiriki, ikiambatana na wasifu unaojitosheleza (CV).

BAVICHA inahimiza vijana kutuma maombi kwa kuwa taarifa za waombaji zitahifadhiwa katika kumbukumbu (data bank) kwa ajili ya fursa nyingine zinazojitokeza.

Mwombaji pia anatakiwa ataje mawasiliano yake, namba ya kadi yake ya uanachama, tarehe ya kujiunga na chama na aeleze ushiriki wake ndani ya BAVICHA na Chama pamoja na matarajio yake ndani ya BAVICHA na CHADEMA kwa ujumla.

Maombi yatumwe kwa Katibu Mkuu wa BAVICHA kupitia bavicha@chadema.or.tz na nakala info@chadema.or.tz kabla ya tarehe 10/03/2012.

Dhima ya BAVICHA ni kuwezesha uwepo wa sera sahihi , uongozi bora na kujenga oganaizesheni thabiti ya vijana kwa maendeleo endelevu.

Duru ya pili ya uchaguzi Senegal yatangazwa

Macky Sall na Rais Wade kwenda kwa duru ya pili ya uchaguzi

Tume ya uchaguzi nchini Senegal imesema kuwa kutakuwepo na duru ya pili ya uchaguzi wa urais baada ya rais wa sasa Abdoulaye Wade, kushindwa kuzoa kura za kutosha kutangazwa mshindi wa moja kwa moja katika duru ya kwanza.

Bwana Wade alipata asilimia thelathini na tano ya kura zote zilizopigwa katika uchaguzi wa urais uliofanyika siku ya Jumapili. Rais huyo sasa atachuana na aliyekuwa waziri mkuu wa nchi hiyo wakati wa utawala wake Macky Sall ambaye alipata asilimia ishirini na sita ya kura zote zilizopigwa.

Hata hivyo ameelezea matumaini ya kunyakua tena uongozi wa nchi.

Awali rais Wade alibashiri kupata ushindi mkubwa katika duru ya kwanza ya uchaguzi.

Wadadisi wamesema rais Wade atakuwa na kibarua kigumu katika duru ya pili ikiwa upinzani utaungana dhidi yake.

Mpinzani wake, Macky Sall amesema yuko tayari kukabiliana na rais Wade na kuongeza kuwa upinzani umeshinda viti vingi zaidi vya ubunge.

Source:BBC 

Chadema Wamchagua Nassari Arumeru

 

Joshua Nassari

Waandishi wetu, Arusha

CHAMA cha Demokrasia na Maendeleo (Chadema), kimemchagua Joshua Nassari kupeperusha yake katika uchaguzi mdogo wa Jimbo la Arumeru Mashariki, utakaofanyika Aprili Mosi, mwaka huu.

Akitangaza matokeo ya uteuzi huo, Mkurugenzi wa Bunge na Oganaizesheni wa Chadema, John Mrema alisema Nassari ameteuliwa baada ya kupata kura 805 sawa na asilimia 90.6 ya kura zote 888 zilizopigwa.

Alisema Nassari aliwaangusha Anna Mghiwa aliyeshika nafasi ya pili kwa kupata kura 23, akifuatiwa na Godluv Simba (18), Rebecca Magwisha (12), Samweli Shami (10), Anthony Mussari (8) na Yohanne Kimuto (6).

“Kura zilizopigwa zilikuwa 888 zilizoharibika ni sita na wagombea wote wametangaza kukubali matokeo,” alisema Mrema. Msimamizi wa uchaguzi huo alikuwa ni mwasisi wa chama hicho, Edwin Mtei.

Ukumbini

Mgombea Musari aliyehamia Chadema baada ya kuangushwa kwenye mchakato wa kutafuta mgombea kupitia CCM aliwaambia wajumbe kwamba, tayari alikwishafukuzwa kazi ya ukuu wa shule hivyo aliomba wajumbe wampigie kura kupeperusha bendera ya chama hicho kikuu cha upinzani nchini katika uchaguzi huo.

Kauli ya mgombea huyo ilimfanya mmoja wa wajumbe kutoka kata ya Maji ya Chai kumhoji iwapo hatahama tena Chadema akikosa kura katika uchaguzi huo wa jana, naye akaahidi kushirikiana na wana Chadema wenzake kutafuta ushindi wa chama chake hicho.

Awali, mzee Mtei alisema chama hicho kinahitaji wabunge wenye kuendesha na kutekeleza sera zinazojibu mahitaji ya

wananchi na jamii wanayoongoza kwa kuhakikisha rasilimali za taifa zinawanufaisha wananchi wote bila kujali tofauti miongoni mwao.

“Hivi sasa wananchi wengi wanakula mlo mmoja kwa siku sababu hawawezi kumudu gharama ya milo miwili na hili linasababishwa na usimamizi na uongozi mbovu wa Serikali ya CCM,” alisema Mtei.

Aliwaasa wana Arumeru kupuuza rushwa inayodaiwa kuwa imeanza kusambazwa sehemu mbalimbali za jimbo hilo na wanaodaiwa kuwa viongozi au wanachama wa CCM na kuchagua kiongozi wanayeamini kuwa atawakilisha hoja na fikra zao bungeni bila kushaiwishiwa kwa rushwa.

CCM wakamatwa kwa rushwa

Katika hatua nyingine, viongozi watatu wa CCM, wanashikiliwa na Taasisi ya Kuzuia na Kupambana na Rushwa (Takukuru) kwa tuhuma za kujihusisha na vitendo vya rushwa kuhusiana na kura za maoni za marudio ndani ya chama hicho.

Kura za maoni zinatarajiwa kupigwa leo na wagombea wawili

walioongoza katika awamu ya kwanza ya kura za maoni zilizofanyika wiki iliyopita, Siyoi Sumari na Wililiam Sarakikya watapigiwa kura.

Kamanda wa Takukuru Mkoa wa Arusha, Mbengwa Kasomambuto alithibitisha jana kwa simu kushikiliwa kwa viongozi hao ambao hata hivyo, alikataa kuwataja majina kwa sababu ya kiuchunguzi.

“Kweli tunawashikilia wana CCM watatu kwa mahojiano baada ya vijana wangu waliotapakaa kila sehemu ya Jimbo la Arumeru Mashariki kuwakuta katika mazingira yanayoashiria uwepo wa rushwa,” alisema...Soma zaidi www.mwananchi.co.tz

CHADEMA Na CCM Kama Republicans Na Democrats

Inavyoanza kuonekana kwa sasa vyama hivi pekee ndivyo vitakuwa vikimenyana kwenye              chaguzi kubwa.ni kama marekani.Naambiwa kule japo kuna vyama vingi sana vidogo hata vya kikomunisti,lakini nyote mnajua kuwa kwa karne sasa ni Republicans na Democrats pekee wanaotawala hasa siasa za nchi hiyo.Mwenendo ulivyo kwa sasa hapa nchini Ni CHADEMA na CCM. Tangu uchaguzi wa 2005 dalili hizi zilianza kuonekana hasa bungeni ambapo ungedhani kulikuwa na wabunge wa vyama hivyo pekee.japo CUF kiliongoza upinzani bungeni lakini kwa maoni yangu ni wabunge wa CHADEMA wale 11 waliojenga taswira ya upinzani.uchaguzi wa 2010 umeiweka CHADEMA kuwa Kambi rasmi ya upinzani pamoja na sarakasi za Hamad Rashid na Kafulila ambazo zilishindwa.

Mnaokumbuka tena katika chaguzi zote ndogo tangia 2005, ni CHADEMA na CCM ndo vimekuwa na ushindani wa kweli.Mnakumbuka kiteto,Tarime,Biharamulo,Busanda,Mbeya Vijijini,Igunga,Uzini,na sasa Arumeru? baadhi ya vyama vimekosa hata pumzi ya kuingia kwenye uchaguzi.

Kwa hiyo hakuna haja ya kuunganisha vyama vya upinzani kama ilivyokuwa inasemwa na baadhi ya watu hata wasomi.vyama vinaweza kuungana mkono tu na siyo kuungana.vilevile hakuna haja ya kuogopa kusajili vyama vipya kwani hata vikiwa 1000 itabaki kuwa CHADEMA Vs CCM.Kweli tunakoelekea ni kuzuri

Mwenyekiti wa chama cha Alliance for Democratic Change (ADC) Said Miraji (kushoto) na Katibu Mkuu wake, Kadawi Limbu wakionyesha rasimu ya Katiba ya chama chao na fomu za kuomba usajili wa muda kwenye ofisi ya Msajili wa Vyama vya siasa jijini Dar es Salaam jana.

Waliojitoa CUF waanzisha ADC

ALIYEKUWA Meneja wa Kampeni za Urais wa CUF mwaka 2010, Said Miraji na wenzake jana waliwasilisha rasmi kwa Msajili wa Vyama vya Siasa maombi ya usajili wa muda wa chama cha Alliance for Democratic Change (ADC). Juzi, Miraji na aliyekuwa mgombea ubunge wa Temeke kwa tiketi ya CUF, Adawi Limbu walijitoa chama hicho na kutangaza kusudio la kusajili chama kipya. Jana, ujumbe wa chama hicho uliwasili katika Ofisi ya Msajili, Dar es Salaam saa 7:30 mchana ukiongozwa na Miraji ambaye alijitangaza kuwa ni Kaimu Mwenyekiti na Katibu Mkuu wake, Limbu na kupokewa na Wangalizi wa Ofisi ya Msajili, Galasia Simbachawene. Akizungumza na viongozi hao, Simbachawene alisema  kulingana na taratibu za usajili wa vyama,  maombi ya chama kabla ya kuwasilishwa kwa msajili yanahitaji kupatiwa muda ili yapitiwe na maofisa mbalimbali akiwemo Mwanasheria wa Ofisi ya Msajili. “Nimepokea maombi. Msiwe wasiwasi yameshafika kwa Msajili. Utaratibu uliopo ni kwamba maombi yanapokewa na kupewa muda zaidi wa kuyapitia kwa kushirikiana na mwanasheria ili kuona kama yamekamilika baada ya hapo yatawasilishwa rasmi kwa Msajili,” alisema Simbachawene. Vitu vilivyowasilishwa jana ni barua ya maombi ya usajili, rasimu ya katiba ya chama iliyoambatanishwa na hati ya kwenda kwa msajili (PF1) pamoja na hati ya kiapo ya kuwa chama cha jamii chini ya Sheria ya Vyama vya Siasa ya  mwaka 1992. Miraji alisema wameamua kuanzisha chama hicho baada ya kutoona chama chochote cha siasa kinachowafaa  kujiunga akisema karibu vyote vinafanana tabia. “Tumeamua kuanzisha chama cha siasa lakini, kitajikita kijamii zaidi.  Hatujafanya uamuzi wa kishabiki kwani siasa za nchi hii zilivyo, si rahisi mtu kutoka chama kimoja kwenda kingine kwani vyote vinafanana, vina maneno matamu sana hasa CCM ,” alisema Miraji. Alisema ili kupata maoni ya wananchi kuhusu katiba ya chama hicho, rasimu ya katiba hiyo itaingizwa kwenye mitandao ya kompyuta pamoja na magazeti  na majarida na kusambazwa katika maeneo mbalimbali. “Hatupo tayari kuwa na katiba ya mtu mmoja wala watu 100 tu, lazima tukusanye maoni ya muundo wa katiba kutoka kwa watu mbalimbali kupitia mitandao na kutoa matangazo kwenye magazeti yatakayoweza kuwafikia watu katika maeneo yote,” alisema Miraji. Alisema katika katiba ya chama chao vitu walivyozingatia ni pamoja na ukomo wa madaraka na kuweka kamati maalumu ya usuluhishi ambayo haitawahusisha viongozi wa juu wa chama ili kuepeka kuwafukuza wanachama wanapofanya makosa ambayo yanaweza kurekebishika. Kwa upande wake, Limbu alisema wananchi wanapaswa kuwa macho na vyama taasisi kwani viongozi wa vyama vya siasa wanafanya vyama hivyo kama mtaji. “Chama hiki hakina mwenyewe watu wanaruhusiwa kuja kujiunga wasisubiri mpaka wafukuzwe katika vyama vingine ambavyo havijui umuhimu na thamani ya wanachama,” alisema Limbu. Limbu aliwataka wanasiasa walio kwenye vyama visivyo na msimamo kuhamia chama hicho ili waweze kutetea haki za wananchi na kuwapa mwelekeo wa Uchaguzi Mkuu wa mwaka 2015. Walikitabiria kifo CUF Walipokuwa wakitangaza kujitoa CUF, Miraji na mwenzake walikitabiria kifo cha chama hicho wakisema kimepoteza mwelekeo kutokana na kuongozwa na watu wanaodhani ni mali yao. Pia walimshutumu Naibu Katibu Mkuu wa CUF Bara, Julius Mtatiro wakisema ameamua kwa makusudi kukiua.Hata hivyo, Mtatiro alijibu tuhuma hizo akisema, “Said Miraji ni mfuasi wa Hamad Rashid kwa muda mrefu sana. Amekuwa akikihujumu chama yeye na Hamad Rashid, kuondoka kwake siyo tishio la CUF. Nafahamu anakwenda kukabidhiwa chama na Hamad Rashid kama kaimu mwenyekiti hadi Hamad atakamoliza ubunge wake, tunamtakia kila la heri katika kujitoa CUF.”

Siasa zetu za Tanzania zinatupeleka wapi?


Maswali ya kujiuliza ni mengi juu ya siasa za bongo.

Wengi watajiuliza tulipotoka ni wapi, tulipo ni wapi na ni wapi tunaelekea tukijua fika Tanzania ni nchi iliyobarikiwa kwa neema ya rasilimali watu na mali, lakini bado tu maskini wa fikra na tajiri wa rasilimali.

Blog hii inalengo kubwa na kutoa fursa ya kubadilishana mawazo wewe na watanzania wengine juu ya mstakabali wa siasa zetu na ni kwakiasi gani tutasaidiana kutoka hapa tulipo. Pamoja na hayo, kuangalia kwa undani aina ya siasa, uchumi na mipangilio ya kijamii ambayo, kama tutaipangilia, itatusaidia kufanya mipango ya kimaendeleo kwa uharaka na kuondoa umaskini uliokidhiri kwa kiasi cha watu kifikiria ni sehemu ya maisha yetu.

Tuwe na lengo la kutafuta njia za kusimamia siasa na taratibu za nguvu na mamlaka ambazo zitasaidia kufanya kazi kwa ufanisi zaidi yazilizopo. Tunataka kufanya hivyo kwa msingi wa umakinifu kwa yale yaliyofanyika vizuri kwa sasa na huko nyuma toka enzi ya Baba wa taifa, Hayati Mwalimu Julius K. Nyerere, kufuatiwa na Mweshimiwa Ali-Hassan Mwinyi, Mweshimiwa Benjamin Mkapa na Mweshimiwa Raisi, Jakaya Mrisho Kikwete.

Karibu kwenye blog hii! Kazi yetu kubwa ndio hii inaanza, lakini tunapendelea kubadilishana mawazo, elimu, ujuzi, fikra na watu wenyewe uelewa mkubwa wa kufikiri na wahamasishaji ambao fikra zao zinashirikiana katika kuendeleza vizuri siasa za bongo, moja ya changamoto kubwa Tanzania