Wananchi Ileje Wafuata Tiba Malawi

WAKAZI wa Wilaya ya Ileje mkoani hapa, wameutaka uongozi wa mkoa huo kuwawajibisha watendaji wa wilaya hiyo kwa kusababisha ukosefu wa huduma za afya.

Kauli ya wakazi hao imekuja siku chache baada ya Baraza la Madiwani wa halmashauri hiyo kumsimamisha kazi Mkurugenzi wake, Silvia Siriwa kwa tuhuma za ubadhirifu.

Wakizungumza kwenye mdahalo ulioandaliwa na asasi za kiraia za Wilaya ya Ileje (ILENGONET) kwa kushirikiana na mashirika ya kiraia Mkoa wa Mbeya (MBENGONET) uliofanyika jana, walidai kuwa uzembe wa viongozi hao unawalazimisha baadhi ya wananchi kukosa matibabu katika hospitali ya wilaya.

Baadhi ya huduma za matibabu wanazokosa wakazi hao ni X-ray na upasuaji hali inayowalazimu wenye uwezo kifedha kwenda Wilaya ya Chipata nchini Malawi umbali wa kilomita 35.